काठमाडौं । काठमाडौं महानगरपालिकामा लिफ्ट जडान प्रक्रियामा अनियमितता भएको आरोप लगाउँदै मेयर बालेन्द्र साहविरुद्ध अख्तियार दुरुपयोग अनुसन्धान आयोगमा उजुरी परेको छ ।
बिना प्रतिस्पर्धा, बिनाटेण्डर र बिनाकोटेसन करिब एक करोड रुपैयाँ बराबरको लिफ्ट जडान गरिएको दाबी गर्दै युवराज सफलले बिहीबार टंगालस्थित अख्तियार कार्यालयमा उजुरी दर्ता गराएका हुन् ।
‘काठमाडौं महानगरपालिकाका मेयर बालेन्द्र साहले केही महिनाअघि महानगरमा बिना प्रतिस्पर्धा, बिना टेण्डर र बिना कोटेसन करिब एक करोड रुपैयाँ मूल्य बराबरको लिफ्ट जडान गरेका छन्,’ सफलले दर्ता गराएको उजुरीमा उल्लेख छ, ‘विशेषतः उक्त लिफ्ट मेयर साहकै प्रयोगका लागि जडान गरिएको महानगरपालिका स्रोतले जनाएको छ ।’
सार्वजनिक निकायको ढुकुटीबाट खर्च गरेर गरिएको लिफ्ट जडान प्रक्रियामा सार्वजनिक खरिद ऐन, २०६३ र सार्वजनिक खरिद नियमावली, २०६४ विपरीत कार्य भएको भन्दै त्यसमा संलग्न सबै पक्षमाथि छानबिनको माग गरिएको छ ।
सफलले दर्ता गराएको उजुरीमा महानगरपालिकाको स्रोतलाई उद्धृत गर्दै लिफ्ट खरिदको प्रक्रिया गोप्य रूपमा गरिएको र पारदर्शिताको पूर्ण अभाव रहेको आरोप समेत लगाइएको छ ।
हालसम्म यस विषयमा मेयर साह वा काठमाडौं महानगरपालिकाले औपचारिक प्रतिक्रिया दिएका छैनन् । अख्तियारले उजुरी दर्ता भई प्रारम्भिक अध्ययन भइरहेको जनाएको छ ।
