रुपन्देही । प्युठानको स्वर्गद्वारी नगरपालिका–९, जुडापाटास्थित माडी खोलाको किनारमा पाँच वटा शव भेटिएका छन् । हिजो राती रोल्पाको पहिरोमा वेपत्ताहरुलाई खोलाले बगाएर ल्याएको आशंका प्रहरी र स्थानीयको छ ।
अपरिचित ती शव रोल्पाको थबाङ गाउँपालिका–५, बोटलबारा क्षेत्रमा हिजो रातिको पहिरोले घर तथा गोठ पुरिँदा बेपत्ता भएकाहरूको हुनसक्ने अनुमान प्रहरीले गरेको छ ।
जिल्ला प्रहरी कार्यालय प्यूठानका प्रमुख डीएसपी नरहरि अधिकारीले माडी खोलामा पाँच वटा शव फेला परेको र जिल्लामा मानिस हराएको वा पहिरो गएको घटना नभएकाले माथिल्लो क्षेत्र रोल्पाबाट बाढीले बगाएर शव प्यूठानसम्म ल्याएको हुनसक्ने प्रारम्भिक अनुमान गरिएको जनाएका छन् । उनका अनुसार फेला परेका शवका तस्बिर रोल्पा प्रहरीलाई पठाइएको छ ।
